ច្បាប់ថ្មីអូស្រ្តាលី នឹងរិតត្បិតទិដ្ឋាការសម្រាប់សិស្សបរទេស

ការអប់រំគឺជាការវិស័យនាំចេញមួយដែលប្រទេសអូស្ត្រាលីរកប្រាក់បានច្រើនជាទីបំផុត ប៉ុន្តែរដ្ឋាភិបាលឆ្វេងនិយមនៅទីក្រុងកង់បេរ៉ាបាននិយាយថា វិស័យអប់រំអន្តរជាតិ ដែលរួមមានមហាវិទ្យាល័យភាសាអង់គ្លេសឯកជនតូចៗជាច្រើន គ្រឹះស្ថានបណ្តុះបណ្តាលវិជ្ជាជីវៈ និងសាកលវិទ្យាល័យធំ ៗ ត្រូវបានគេប្រើប្រាស់ជាមធ្យោបាយមួយសម្រាប់ជនអន្តោប្រវេសន៍ដែលគ្មានជំនាញ ហើយពួកគេចូលមកក្នុងទឹកដីប្រទេសអូស្ត្រាលីដើម្បីស្វែងរកឱកាសការងារ និង ការរស់នៅអចិន្ត្រៃយ៍តែម្តង។

លោក Michael Wesley អនុអធិការបតីនៃសាកលវិទ្យាល័យ Melbourne បានប្រាប់ក្រុមហ៊ុន Australian Broadcasting Corp កាលពីថ្ងៃអង្គារថា លោកសង្ឃឹមថា រដ្ឋាភិបាលនឹងកំណត់គោលដៅអ្នកផ្តល់សេវាអប់រំណាដែលប្រព្រឹត្តិខុសច្បាប់។

លោក Wesley បាននិយាយថា “យើងស្វាគមន៍ការបង្ក្រាបលើអ្នកផ្តល់សេវាអប់រំមិនពិតប្រាកដ ដែលផ្តល់នូវច្រកទ្វាមួយ ចូលទៅក្នុងការស្នាក់នៅអចិន្ត្រៃយ៍សម្រាប់អ្នកដែលមិនមែនជាសិស្សពិតប្រាកដ” ។ ហើយ លោក Wesley ក៏ បាននិយាយថា “យើងមានទំនុកចិត្តថានិស្សិតអន្តរជាតិរបស់យើងទាំងអស់គឺជាសិស្សពិតប្រាកដ ហើយដូច្នេះយើងសង្ឃឹមថាឥទ្ធិពលនៃការកាត់បន្ថយទិដ្ឋាការទាំងនេះនឹងបញ្ឈប់នូវចេតនាមិនពិតប្រាកដសម្រាប់សិស្សនិស្សិតដែលមានបំណងចង់មកបន្តការសិក្សានៅប្រទេសអូស្រ្តាលី»។

ការជួលកន្លែងស្នាក់នៅក្នុងទីក្រុងធំៗជាច្រើនរបស់អូស្ត្រាលី ជារឿយៗមានតម្លៃថ្លៃ និងមានការខ្វះខាត។អ្នកវិភាគបាននិយាយថាការឡើងថ្លៃដោយសារមានការវិនិយោគតិចទៅលើលំនៅឋានសមរម្យនៅក្នុងប្រទេស។ស្ថាប័នអប់រំនឹងត្រូវតម្រូវឱ្យសាងសង់កន្លែងស្នាក់នៅសម្រាប់សិស្សរបស់ពួកគេ ប្រសិនបើពួកគេចង់បានចំនួនសិស្សលើសពីដែនកំណត់នៃច្បាប់កាត់បន្ថយនេះ។ កូតាជាក់លាក់សម្រាប់និស្សិតអន្តរជាតិមិនទាន់ត្រូវបានផ្សព្វផ្សាយជាសាធារណៈនៅឡើយទេ។

គួរបញ្ជាក់ផងដែរថា ច្បាប់នេះវានឹងប៉ះពាល់ខ្លាំងដល់ សិស្សនិស្សិតកម្ពុជា និង សិស្សនិស្សិតផ្សេងទៀតជាពិសេសមកពីតំបន់អាស៊ីដែលមានបំណងចង់ដាក់ពាក្យស្នើសុំអាហាររូបករណ៍ ទៅសិក្សានៅសាកលវិទ្យាល័យអូស្រ្តាលី។