សហរដ្ឋអាមេរិកគំរាមអ៊ីរ៉ង់ បន្ទាប់ពីស្ថានទូតខ្លួនត្រូវបានវាយប្រហារ

(Fox News) កាលពីរសៀលថ្ងៃអង្គារនេះ លោក ប្រធានាធិបតីអាមេរិក បានសរសេរថា ” អ៊ីរ៉ង់ត្រូវទទួលខុសត្រូវទាំងស្រុងទៅលើការបាត់បង់អាយុជីវិត និងការខូចខាតផ្សេងៗ នៅក្នុងបរិវេណស្ថានទូត។ អ៊ីរ៉ង់ត្រូវបង់ថ្លៃយ៉ាងសម្បើម ។ នេះមិនមែនជាការព្រមានទេ តែជាការគំរាម។ សួស្តីឆ្នាំថ្មី។

ស្ថានទូតអាមេរិកដែលមានមូលដ្ឋានក្នុងទីក្រុងបាងដាដ(ប្រទេសអ៊ីរ៉ាក់) ត្រូវបានបំផ្លិចបំផ្លាញដោយក្រុមបាតុករ និកាយ សីុអេត រាប់ពាន់នាក់។ ពួកគេទំនងជាត្រូវបានទទួលភ្លើងខៀវពីខាងសំណាក់អ៊ីរ៉ង់។ ហ្វូងបាតុករទាំងនេះបានវាយលុកចូល រើកម្ទេចប្រពន្ធ័កាំម៉េរា និងព្រមទាំងបានដុត ប៉ុស្តិ៍សន្តិសុខយាម របស់ស្ថានទូត។

ការផ្ទុះកំហឹងនេះ កើតឡើងបន្ទាប់ពីមានការវាយប្រហារពីដែនអាកាសរបស់អាមេរិកទៅកាន់ទីតាំងធំៗមួយចំនួន នៅក្នុងអ៊ីរ៉ាក់ និង អ៊ីរ៉ង់។ ទីតាំងទាំងនេះជាកន្លែងលាក់ខ្លួនរបស់ ក្រុមប្រយុទ្ធ កាតាប់ ហាប៊ូឡា (Kataeb Hezbollah) ដែលគាំទ្រដោយអ៊ីរ៉ង់។សកម្មជនប្រយុទ្ធប្រមាណជា ២៥ រូបត្រូវបានស្លាប់នៅក្នុងការវាយប្រហារតាមដែនអាកាសរបស់អាមេរិក។

សម្រាប់សហរដ្ឋអាមេរិក ការវាយប្រហារនេះគឺជាការសងសឹកទៅលើការវាយប្រហាររ៉ូកែតរបស់អ៊ីរ៉ង់ដែលធ្វើអោយបាត់បង់អាយុជីវិតពលរដ្ឋអាមេរិចកាំងមួយរូបដែលជាអ្នក វិនិយោគខាងផ្នែកសាងសង់។

បើយោងតាមមន្រ្តីការពារជាតិមួយរូបបានរាយការណ៍ទៅកាសែត Fox News ថា អាមេរិកបាន បញ្ជូនទ័ពម៉ារីន (យោធាពិសេសជើងទឹក) ប្រមាណជាង ១០០ នាក់ទៅកាន់ស្ថានទូតដើម្បីការពារសុវត្ថិភាពដល់បុគ្គលិកនៅទីនោះ។ ជាមួយគ្នានេះដែរ អាមេរិកក៏បានបញ្ជូន ឧទ្ធម្ភាគចក្រ ពិសេសប្រភេទ អាប៉ាជេ (Apache) ហោះពីលើស្ថានទូត ទម្លាក់ភ្លើងសញ្ញា (Flare) ដើម្បីបំបែកហ្វូងបាតុករ។