បុរសកំសត់ “មិនអីទេពូ! អរគុណ”

ប្រហែលជាចំណងជើងនៃអត្ថបទនេះធ្វើអោយបងប្អូនអ្នកអានមានការឆ្ងល់ ថាតើអ្នកសរសេរចង់និយាយពីអ្វី។ នៅក្នុងរូបភាពនេះ អ្នកមើលឃើញ លុយក្រដាស ២០ ដុល្លារ មួយសន្លឹក និង រូបគំនូរបុរសកំសត់ម្នាក់។ 

រឿងនេះកើតឡើងម្សិលមិញ នៅផ្សារក្នុងភូមិឪពុកម្តាយខ្ញុំ។ មានបុរសម្នាក់កំពុងតែឈរដូរលុយ។ ម្ចាស់ហាងប្តូរប្រាក់ពិនិត្យមើលលុយដុល្លារបុរសនោះ។ គាត់ឃើញមានឆ្នូតទឹកប៊ិចប្រហែលកន្លះថ្នាំងដៃ។ ម្ចាស់ហាងបាននិយាយទៅកាន់បុរសនោះថា “សុំទោស លុយនេះ ដូរបាន តែត្រូវ កាត់ទឹក ប្រហែល ៥ ដុល្លារ”។  ខ្ញុំឈរនៅទីនោះ រង់ចំាប្តូរលុយដែរ។ ឃើញដូច្នោះ ខ្ញុំមានអារ្មណ៍ អាណិតបុរសនោះខ្លំាងណាស់។ បើគិតមើលទៅ លុយនោះ មិនរហែកអីទេ វាគ្រាន់តែមានគំនូសបន្តិច ហើយខ្ញុំឆ្ងល់ថា មិចបានជា ត្រូវកាត់ទឹកជិត ៣០ ទៅ ៤០ % វិញ។ 

បុរសនោះបានឆ្លើយទៅកាន់ម្ចាស់ហាងនោះ ថា “អត់អីទេពូ! អរគុណ” រួចក៏រៀបនឹងចេញដំណើរទៅ។ ភ្នែករបស់ខ្ញុំវិលសម្លឹងទៅមើលទឹកមុខគាត់ និង មើលសកម្មភាពរបស់គាត់រៀបនឹងជិះម៉ូតូចេញពីកន្លែងដូរលុយ។ ខ្ញុំឃើញ បង្វិចសម្ពាយរបស់គាត់ មើលទៅគាត់ទំនងជាអ្នកដំណើរពីចម្ងាយ ហើយប្រហែលជាគាត់ត្រូវវិលបកទៅស្រុកភូមិគាត់វិញ ដោយទឹកមុខក្រៀមក្រំនិងការមិនអាចដូរលុយប្រលាក់ទឹកស្នាមឆ្នូតបន្តិចនេះ។ រំពេចនោះ ខ្ញុំដឹងថា លុយដុល្លារនោះ ខ្ញុំអាច យកទៅចាយនៅទីក្រុងបាន ឬ អាចទម្លាក់ចូលក្នុងកុង ធានាគារបាន។ 

បន្ទាប់ពីខ្ញុំប្តូរលុយខ្លួនឯងរួចមក ខ្ញុំបានដើរសំដៅទៅបុរសម្នាក់នោះ ដែលគាត់រៀបនឹងចេញដំណើរ។ ខ្ញុំប្រាប់គាត់ថា “តើ បងចង់ប្តូរ លុយនេះ ជាមួយខ្ញុំបានទេ ខ្ញុំអោយបង ៨០០០០ រៀល ហើយខ្ញុំមិនកាត់ទឹក អីទេ?”  ពេលលឺដូច្នេះ បុរសម្នាក់នោះ ផ្លាស់ប្តូរទឹកមុខរបស់គាត់ មកស្រស់ស្រាយវិញ គាត់ថា “បាទ បាទ បង  ខ្ញុំព្រម ” ។  ខ្ញុំក៏ហុចលុយ ៨០០០០ មឺុនអោយគាត់ ប្តូរនឹងលុយ ២០ ដុល្លារប្រលាក់បន្តិចរបស់គាត់។ បុរសនោះ ធាក់ម៉ូតូគាត់ចេញដំណើរទៅភូមិគាត់ ដោយទឹកមុខរីករាយឡើងវិញ។ 

ពេលខ្ញុំសរសេររឿងនេះឡើង មិនមែនចង់ទាញចំណាប់អារម្មណ៍ពីចិត្តសប្បុរសពីខ្លួនឯងនោះទេ។ ខ្ញុំគ្រាន់តែចង់អោយបងប្អូនមិត្តអ្នកអាន ជាពិសេសបងប្អូនអាជីវករ សូមមេត្តាពិចារណារ ដោយមានចិត្តមេត្តាធម៏ យោគយល់ ដល់បងប្អូនរួមជាតិដែលលោកមិនមានចំណេះដឹងច្រើនពីសង្គម។ តាមពិតទៅរឿងនេះ មិនមែនជាររៀបរកលុយតាមផ្លូវត្រឹមត្រូវនោះទេ បើតាមការយល់ឃើញខ្ញុំ នេះជាការឆ្លៀតឱកាសទៅវិញទេ ព្រោះលុយនេះ មិនមែនរហែកខ្លំាងនោះទេ វាគ្រាន់តែមានការប្រលាក់ទឹកឆ្នូតបន្តិច។ ហើយបើទោះជាត្រូវកាត់ទឹក ក៏មិនដល់ថ្នាក់ ៣០ ទៅ ៤០ ភាគរយនោះដែរ។ 

មួយវិញទៀត៥ ដុល្លារ ស្មើរនឹង ២០០០០ រៀល ។ ចំនួននេះ បើនៅទីក្រុង គឺអ្នកត្រូវធ្វើការ កន្លះថ្ងៃ ហើយ បើនៅស្រុកភូមិជនបទវិញ អ្នកអាចត្រូវធ្វើការ ពេញមួយថ្ងៃឯណោះ។ 

បងប្អូនអាចផ្តល់មតិយោបល់ខាងក្រោមនេះបាន។