ប្រយ័ត្នធ្លាក់ពីលើខ្នងសេះ

ពេលមួយអ្នកកំពុងជិះសេះយ៉ាងស្ទាត់ជំនាញ។ ពេលសេះរត់កាន់តែលឿន ភ្នែករបស់អ្នកក៏ក្រលេកឃើញមនុស្សជាច្រើនកំពុងសំលឹងមកកាន់អ្នក។ ក្នុងនោះមានមនុស្ស ២ ក្រុម។

ក្រុមទី១ ស្រែកឡើងថា ÷ គាត់នេះពូកែខ្លាំងណាស់ ឡូយណាស់ និង អស្ចារ្យណាស់់ ។

ក្រុមទី២ ស្រែកថា÷ គាត់នេះជា មនុស្សអឺ ជាមនុស្សអួត និង ជាមនុស្សជោរ គ្មានលេខដាក់។

បើសិនជាអ្នកមិនស្គាល់ខ្លួនឯងច្បាស់ និង មិនដឹងពីសមត្ថភាពដែលខ្លួនមាន ភាពខ្លាំងដែលខ្លួនមាន ឬ ភាពខ្សោយដែលខ្លួនមាន ប្រហែលជាអ្នកផ្តោតលើសម្រែករបស់ក្រុមមនុស្សទីមួយច្រើនជាង។ ហើយប្រសិនបើអ្នក ផ្តោតជ្រុលពេក អ្នកអាចភ្លេចខ្លួន ដោយរំភើបខ្លាំងពេក ហើយអាចធ្លាក់ពីលើខ្នងសេះក៏ថាបាន។

ប្រសិនបើអ្នកជាមនុស្សដែលមានគោលបំណង និង ទិសដៅច្បាស់លាស់ សម្រែករបស់ក្រុមមនុស្សទី២ បើទោះជាលឺខ្លាំងយ៉ាងណា ក៏វាមិនសូវមានឥទ្ធិពលលើអ្នកខ្លាំងនោះទេ។ អ្នកគ្រាន់តែផ្តោតលើទិសដៅដែលអ្នកចង់ទៅ និង ប្រុងប្រយ័ត្ន តោងសេះអោយជាប់ ប្រយ័ត្នធ្លាក់ ហើយខ្មាស់គេ។ សំខាន់ទៅអោយដល់គោលដៅសិន។