មតិយោបល់: ការស្លាប់ទារក ៦ ខែ

ពេលអានអត្ថបទនេះ ខ្ញុំពិតជាមានការសោកស្តាយ និង ក្រៀមក្រំយ៉ាងខ្លាំងចំពោះការការបាត់បង់អាយុជីវិតរបស់ទារកតូចនេះ។

ពេលខ្លះ យើងអាចបន្ទោសម្តាយ ឬអ្នកមើលថែក្មេង ហេតុម្តេចបានជាមិននាំទារកនេះ មកមន្ទីរពេទ្យរដ្ឋ។

យើងអាចដាក់ការសន្និដ្ឋានច្រើន អំពីមូលហេតុ។ វាអាចជាភាពឆោតល្ងង់ កង្វះចំណេះដឹង ឬ កំហឹងរបស់ប្តីប្រពន្ធ ជាដើម។

ភាពក្រីក្រ គឺពិតជាឬសគល់ ដ៏គួរអោយស្មុគស្មាញ។ ខ្ញុំធ្លាប់ហែល ច្រើនហើយ ដូច្នេះខ្ញុំយល់ស្ថានភាព និង អារម្មណ៍នៃទុកលំបាក ដោយសារភាពក្រីក្រ។

បើទោះបីជា បងប្អូនមានផ្ទះសំបែង ត្រឹមត្រូវ មានយាន្តជំនិះ និង លុយកាក់សមរម្យក្នុងសង្គមក៏ដោយ ពេលខ្លះ ស្ថានភាពបន្ទាន់មួយចំនួន ប្រហែលជាបងប្អូនក៏ពិបាកនិងដោះស្រាយដែរ។

ខ្ញុំជឿថា បងប្អូនមួយចំនួន ប្រហែលមិនមានបទពិសោធន៍ឧស្សាហ៍ចូលពេទ្យតូច ពេទ្យធំច្រើន នោះទេ។

ឧទាហរណ៍ ពេលមានសមាជិកក្នុងគ្រួសារណាម្នាក់ឈឺ បន្ទាន់កណ្តាលយប់ តើបងប្អូននឹងនាំគាត់ទៅទទួលការព្យាបាលនៅទីណា?

បញ្ជាក់: ការសម្រេចចិត្តរបស់អ្នក អាចកំណត់ជោគវាសនាអាយុជីវិតរបស់អ្នកជំងឺ បាន។ ដូច្នេះត្រូវចងចាំថា ទ្រនិចនាឡិកា គឺកំពុងវិលលើដៃរបស់អ្នកហើយ។

បើឯកបកទៅកាន់រឿងស្លាប់របស់ទារកនេះ វិញ ប្រហែលសេវាមន្ទីរពេទ្យ គេមិនគិតថ្លៃសម្រាប់អ្នកក្រីក្រនោះទេ ប៉ុន្តែសម្រាប់ បងប្អូនមួយចំនួនប្រហែល ដល់ថ្នាក់នឹងគ្មានលទ្ធភាពធ្វើដំណើរមកកាន់មន្ទីរពេទ្យទៀត។ ជឿខ្ញុំចុះ ខ្ញុំដឹង ហើយខ្ញុំក៏មានបទពិសោធន៍ដែរ។

ពាក្យថា “ក្រ” ត្រូវបានគេបែងចែកជា ២ ទៅ ៣ ប្រភេទ។ ឧទាហរណ៍ “ក្រធៀប” ក្រប្រភេទនេះគេ សំដៅទៅលទ្ធភាពលើស តម្រូវការមូលដ្ឋានបន្តិច។ គាត់មានបាយហូប មានកន្លែងស្នាក់នៅ មានមធ្យោបាយធ្វើដំណើរ មានសំលៀកបំពាក់គ្របបាំងខ្លួន តែបើធៀបជាមួយអ្នកដ៏ទៃ គាត់មិនមានច្រើនដូចគេ ឬ មិនសូវមានគុណភាពខ្ពស់ ឬ ស្តង់ដារខ្ពស់ដូចគេ។ ឧទាហរណ៍ គាត់មានទូរស័ព្ទ អាចទំនាក់ទំនងនឹងគេដែរ តែគាត់មានត្រឹមតែ ដែលគេនិយមហៅថា N ចុចពិល ។ គាត់មានអាហារបរិភោគតែ មិនមែន អាហារក្នុង ភោជនីយដ្ឋានល្បីៗ ធំៗ នោះទេ។

ចំណែក “ក្រ” មួយប្រភេទទៀត គេហៅថា ក្រ តោកយ៉ាក ខ្ញុំគិតថាភាសាអង់គ្លេស គេហៅថា absolute poverty ។ ក្រ កម្រិតនេះ គឺសំដៅទៅលើ ការគ្មានលទ្ធភាព បំពេញតម្រូវការមូលដ្ឋានបាន ដូចជា គ្មានបាយបរិភោគគ្រប់គ្រាន់ គ្មានកន្លែងរស់នៅសមរម្យ ….។ល។ ក្រ ប្រភេទនេះ ពេលខ្លះ គេ ហៅថា ក្រ ខ្វះអង្ករច្រកឆ្នាំង។ ជឿខ្ញុំចុះ ខ្ញុំស្គាល់ អ្នកប្រភេទនេះ និង ធ្លាប់ឆ្លងកាត់ខ្លួនឯង ខ្លះៗដែរ។

“ក្រ” ប្រភេទទី ២ នេះហើយដែល សង្គមយើង រាងរើសអើង។ សូមទោស សម្រាប់ការប្រើប្រាស់អត្ថន័យបែបនេះ ខ្ញុំគ្មានគោលបំណងនិយាយត្រង់ នោះទេ។

សរុបមក ខ្ញុំគ្រាន់តែចង់លើកទឹកចិត្តបងប្អូន អោយចេះខ្នះខ្នែង ប្រឹងប្រែង តស៊ូ ខិតខំអោយចាកចេញពី ប្រភេទក្រ ទី ២ នេះ ។ ហើយបើទោះជា បងប្អូន មាន ឬ ស្គាល់អ្នកណា កំពុង ឆ្លងកាត់ ប្រភេទទី ២ នេះ សូមមេត្តា កុំរើសអើង ស្អប់ខ្ពើម ត្បិតលោកក៏មានឈាមជ័រជាខ្មែរដូចតែយើងដែរ។

សូមបន្តសាបព្រោះ វប្បធម៌នៃការចែករំលែក ដោយក្តីស្រឡាញ់ ចេញពីចិត្តស្មោះ