នីតិវិធីច្បាប់ទម្លាក់ប្រធានាធិបតីអាមេរិក

ភាពតានតឹងរបស់់តំណាងរាស្ត្រមកពីគណបក្ស ប្រជាធិបតេយ្យ និង សាធារណរដ្ឋ កំពុងតែធ្វើឲ្យមានការប្រេះឆារវាងបក្សទាំងពីរ នៅក្នុងសភាជាន់ទាប ឬ សភាតំណាងរាស្ត្រសហរដ្ឋអាមេរិក។ បក្សទាំងពីរ បានធ្វើការដេញដោលគ្នាអស់់មួយរយៈ ទាក់ទងនឹង ករណីបទចោទប្រកាន់ប្រធានាធិបតីថាបានលួចទាក់ទងមេដឹកនាំប្រទេសអ៊ុយក្រែនលោក លោក វ៉ូដេមៀ ហ្សាលិនស្គី ( Volodymyr Zelensky) ដើម្បីឲ្យមានការស៊ើបអង្កេតលើ លោក ជោរបាយឌិន (Joe Biden) អតីតអនុប្រធានាធិបតី សហរដ្ឋអាមេរិក និង កូនប្រុសរបស់លោកផ្ទាល់ ពាក់ព័ន្ធនឹងអំពើពុករលួយ។

បើតាមអ្នកទម្លាយកិច្ចការផ្ទៃក្នុង (whistleblower) ការសន្ទនានេះចាត់ទុកថាជាការរំលោភបំពានលើអំណាចនិតិប្រតិបត្តិរបស់ប្រធានាធិបតី នេះក៏ដោយសារលោក ជោរបាយឌិន (Joe Biden) គឺជាបេក្ខជនប្រធានាធិបតីមកពីគណបក្សប្រជាធិបតេយ្យ ហើយការស្នើសុំសុើបអង្កេតក្រៅផ្លូវការនេះ គឺក្នុងគោលបំណងផ្តួលដៃគូរបស់ខ្លួនមុនការបោះឆ្នោតជ្រើសរើសប្រធានាធិបតីនៅអាណត្តិក្រោយ។

បក្សទាំងពីរបានជជែក ដេញដោលទៅលើភាពស្អាតស្អំរបស់លោកប្រធានាធិបតី ដោយផ្អែកទៅលើកំណត់ត្រាពាក្យពេចន៍នៃការសន្ទនារវាងលោកប្រធានាធិបតី និង ថ្នាក់ដឹកនាំប្រទេសអ៊ុយក្រែន។

បើទោះជាមានការការពារមកពីខាងគណបក្សសាធារណរដ្ឋក៏ដោយ សាវនាការស្តាប់សាក្សីពាក់ព័ន្ធមួយចំនួននៅក្នុងសភាតំណាងរាស្ត្របានឈានដល់ការ ប្រកាសមាត្រាក្នុងរដ្ឋធម្មនុញ្ញស្តីពីការទម្លាក់ប្រធានាធិបតីសភាអាមេរិក។

គណកម្មការសភាតំណាងរាស្ត្រ៦រូប ត្រូវបានចាត់តាំងក្នុងការស៊ើបអង្កេតលោកប្រធានាធិបតី ដូណាល់ ត្រាំ ហើយបន្ទាប់មកសំណុំបែបបទត្រូវដាក់បញ្ជូនទៅកាន់គណកម្មការអង្គចៅក្រមសភាតំណាងរាស្ត្រ

ដំណាក់កាលស្តាប់សាក្សី និង ប្រមូលភស្តុតាងត្រូវបានបញ្ចប់ ។ បើតាមនិតិវិធី លុះត្រាតែមានភស្តុតាងគ្រប់គ្រាន់ ទើបតំណាងរាស្ត្រ នៃសភាជាន់ទាបអាចធ្វើការបោះឆ្នោតគាំទ្រអោយមានការប្រកាសនូវមាត្រា រដ្ឋធម្មនុញ្ញស្តីពីការទម្លាក់ប្រធានាធិបតី។

និតិវិធីច្បាប់ទម្លាក់ប្រធានាធិបតីអាមេរិក

ក្នុងករណីមិនមានភស្តុតាងគ្រប់គ្រាន់ទេនោះ លោកប្រធានាធិបតីនៅតែបន្តរក្សាតំណែងរបស់ខ្លួនបាន។

តាមជាក់ស្ដែង សមាជិកតំណាងរាស្ត្រគណបក្សប្រជាធិបតេយ្យមានសម្លេងច្រើនជាងនៅក្នុង សភាជាន់ទាប ឬ សភាតំណាងរាស្ត្រ ដូច្នេះហើយ សំណុំរឿងត្រូវបានសម្រេច ដោយមានសម្លេង ២៣ ទល់ ១៧ ។ ដូចេ្នះសំណុំរឿងនឹងឈានដល់ការប្រកាស មាត្រារដ្ឋធម្មនុញ្ញ ទម្លាក់ប្រធានាធិបតី លើបទចោទប្រកាន់ ២ បទ។ មួយគឺ ល្មើសបំពាន អំណាចនិតិប្រតិបត្តិរបស់ខ្លួន និង ទីពីរ ការរាំងថ្កាត់ និតិវិធី ឬ ដំណើរការរបស់សភា។

បទចោទប្រកាន់ទាំងពីរនេះត្រូវច្រានចោលដោយសមាជិកគណបក្សសាធារណរដ្ឋ។ អ្វីដែលនឹងកើតឡើងបន្ទាប់គឺសំណុំរឿងនឹងត្រូវ ធ្លាក់ទៅក្នុងសភាជាន់ខ្ពស់ ឬ ព្រឹទ្ធសភា។ បើតាមនិតិវិធី លុះត្រាតែមាន សម្លេង ២/៣ ទើប ករណីទម្លាក់ប្រធានាធិបតីនេះ ទទួលអំណាចផ្លូវច្បាប់ក្នុងការ ដកប្រធានាធិបតីពីតំណែង និង ប្រឈមមុខនឹងការទទួលទោសរបស់ខ្លួនបាន។

បើមើលតាមទិដ្ឋភាពជាក់ស្តែង សម្លេងរបស់សមាជិករបស់ គណបក្សសាធារណរដ្ឋគឺច្រើនជាង បក្ស ប្រជាធិបតេយ្យ។ ដូច្នេះ សំណុំរឿងប្រហែលជាមានការ លំបាកក្នុងការឈានទៅរកការជោគជ័យក្នុងការទម្លាក់ប្រធានាធិបតីអាមេរិក លោក ដូណាល់ ត្រាំ។

ក្នុងករណីដែលមានការឯកភាពពីខាងសមាជិកមកពីខាងគណបក្សសាធារណរដ្ឋ បង្រ្គប់សម្លេង ២ /៣ លោកប្រធានាធិបតីនឹងត្រូវដកចេញពីតំណែង ហើយ អនុប្រធានាធិបតី និងត្រូវឡើងមកកាន់តំណាងជាប្រធានាធិបតីបណ្តោះអាសន្នសិន។